Menu

PART- I JUDAISM

PART- I JUDAISM
(Is Judaism the same religion of the Hebrew – Israelites?)
BUNG – 1
JUDAISM HUNGKIPAT DAN
Itidana nanghon, ‘Keiho miching kahiuvin, Pakai danthu chu keiho koma aum jinge,’ natiu ham? Ahinla vetan, danthu sunho lekha jihna mol (pen) chun thujou jeng asut ahi. (Jeremiah 8:8)
Judaism hi ahung akipatna leh amun hetthei hita hih jongleh vannoiya Pathen hing khat bouseh tahsan ho lah a ana um masapen sakho ho (Religion) lah a khat hiding a mi tamtah in ahet ahi. Judaism ahung kipatna chung changa Bible them phabep ho tahsan danin, ‘Abraham koma Pathen in kitepna ana-sem’a chu Judaism hung kipan ahitai.’ atiuve. Ahilah akimkhat in, ‘Judaism hi Judate Babylon gama gal-hing’a kaimang’a aumlaijuva hung umdoh Jewste tahsa leh lhagaova kilam-kaina chonna dan chu Judaism kiti ahi.’atiuve. Bible hethem, Matthew leh Nichols in atahsan dungjuiyin, “Judaism hi Pathen in Abraham koma cheptan ding thupeh apeh a kona chu kipan ahitai,” ati lhone. Chutoh kilhon in S. Cohen kitipan jong, “Judaism tahsan leh amin ho hi Thulhun Lui (O.T) a kiladoh ngensen ahi jeh in, Abraham khanglaiya kipan hitei inte,” tin aginchat thu ana-seiyin ahi.
Israelte sakho (Religion) hi Abraham a kipan ahilou jongleh Mose koma Pathen Danthupeh a chu kipan hitei dingin tahsan aumin ahi. Ahinlah, Israelte tahsan chu Judaism vang ahipoi. Hiche tahsan (Pathen houdan) hi Mose Danthupeh a konin hou khatnin suhdet in ahung umin, Israel lengte khanga Solomon in Jerusalem’a Pathen houin ahinsah jou chun hiche tahsan hi Jerusalem a suhdet ahung hitan ahi. Hiche tahsan (religion) hi 586 B.C a Judah gam chu Babylon lengpan gal’a ahinlah chan chun, Palestine gamsung bouva Israelte leh Judate Sakho (Religion) ana-hije. Assyria gam leh Babylon gama Israel chate leh Judate soh leh sal-a kaimanga aum sungun, amaho Pathen houdan chu sem lamdang ahung hitan ahi. Hiche phatlai chun Judaism hi Israel chate tahsan (sakho) leh Jews hi Israel chate jouse ki-minsahna in ahung umdoh tan ahi.

Semthu Dan a Kona Judaism
Bible a Israel chaten Pathen ana-houdanu chu Judaism ahipoi. Juda mite chu, Babylon gama gal-hinga kaimanga aumlaiyu chun, amaho lah’a Hou ngaisah, miching phabep hon Pathen Dan thupeh savun a kijih ho chu akichoiyun, Babylon gama anasim jing-un Judea gamsunga Pathen hou tobang lom hihih jongle, amahon anitthei dol hou Dan Thupeh chu ana-juiyuve. Ahin mi gama asohchan nauva chun Israel gamsunga achen noplaiyu banga kithoina gantha ho chu aumthei tahlou jeh chun, kithoina umlouva Pathen ahounau leh Semthu Dan aboldoh hou juiho chu khonung in, Judaism ahung kititauvin ahi. Hiche hi vannoi gamtin a kithecheh Jews hon Greek culture a kona kivendohna dingleh puchon-pachon suhmil-louna dinga tahsa leh lhagaova kipui-huoina dinga chondan ahinsemdoh-u chu ahi. Hiche chung changa C.M Pilkington, Bible them mi khatnin aseina chun, “Bible a Israel mite Pathen tahsan leh houdan chu Judaism ahi, kiti theiponte. Ajeh chu Bible a Pathen kihoudan leh Judaism tahsan hi akibahna ima aumpoi.” atin ahi.
Judaism sakho hi ahung kipatdohna bul chu Palestine gam pama um Jews hoa kona hung kipandoh ahi. Hiche hi Bible a Israel mite tahsan toh akibang pon ahi. Hijeh chun amaho lah jenga jong tahsan thu in akitoh thei pouvin ahi. Judate chu Babylon gama gal-hinga akikaimang jouvun, Jerusalem Houin a kithoina gantha ho abolthei tah lou jeh-un, hiche thalheng chun akikhop khomnau mun Synagogue ah nikhat leh thumvei atao jiuvin ahi. Khonung in Jerusalem a kithoina gantha ahung umkit vangin Synagogue a taona chu abeideh tapon ahi. A.D 70 a Jerusalem Houin akisuhchima Jews mite kithoina gantha suhbeiya ahung um phatnin Synagogue a taona hi Pathen koma kilhaina gantha bangin aumden tan ahi. Hitichun Judaism hi Thulhun Lui phatlaiya (O.T) Pathen houdan toh jong akibah lou toh kilhonin Babylon gama asohchan laiya hung kisepdoh/umdoh Jewste dinga tahsa-lam leh lhagao lama kipuina chondan khat ahijon ahi.
2.Hilchet Bu Judaism Bible Akiso
Bible a Israel mite phatlai chun Pathen Dan thupeh hi Danthu sun dinga ki-nganse hon (Scribes) anasun son-son-un ahi. Hitichun Pathen Danthu peh asut u-toh kilhonin pha asah lai-laiju chu amaho deilam tah-in jong ana hilchen jiuvin ahi. Amaho chu Nehemiah phatlaiya Danthu sunho ahung hipeh uve. Hiche hilchet abol-u hi Pathen thupeh bangin khautah in ana juiyun, Dan Thupeh asutson’u toh kilhonin mihon ajui dingin jong ana-hilpeh uvin ahi.
Vetsahnan: Babylon soh channa a kona hung kinungle gamdang miho toh kichengho chu aji achateu toh ana-khenun ahi (Ezra 9:1,2; 10:2-44). Hiti chun khonungin hiche hilchet ho chu Semthu Dan (Kam a Kiseitho Dan) tin ahung umdoh in lekhabu in jong ahin sundoh uvin ahi. Hiche Semthu Dan chu alimgon; Bible a Pathen Thupeh toh akilo lheh vangin, Bible a Pathen Danthupeh toh akikal in, akibang pon ahi. Hijeh chun Jesun jong, hiche Semthu Dan juiya, mihil a pang Pharisee ho leh Danthu Sunho chu anaphohsal in ahi. Ahin Pathen Danthupeh vang Jesun “..asubulhit ding joh a hung ah kahi,” ati (Matthew 5:17-20).

We Will Write a Custom Essay Specifically
For You For Only $13.90/page!


order now

Hiche Danthu kiledoh ho leh Hilchetna kibol ho hi Pathen Danthupeh toh akikal lheh vangin Juda hou lamkai hon semphat sangin, hichu Pathen Thupeh sanga sangjo danin apomun ahi. Khonung in hitia Semthu Dan tamtah juihoa konin Judaism hou (Religion) ahung umdoh lotan ahi. Hiche Judaism kiti hi Thulhun Lui a Israel mite Pathen tahsan toh akibang pon ahi. Hichu Danthu aledoh dan ule ajuidanun aki-hetheiyin ahi.Talmud Kisemdoh Dan
Talmud kiti hi Judaism ho dinga Bible tobang ahi. Hiche hi Mishna leh Gemara kigom ahi. Hiche Mishnah hung kisemdohna ding hin A.D 200 chun Rabbi 120 ana-kikhomun Semthu Danho jouse lah-a thupi asahdom ho jouse chu ahinla khomun hichu Judah Hanasi kiti pan ahin jihkhom in amin, ”Mishnah” asah in ahi. Judah Hanasi hi Jews mite dinga hou lamkai len khat ahi. Mishnah hi Rabbi 120 ho thuhil kilakhom ho chu ahi. Ahin hiche Mishna kijih hi tuni chanin akichai thei hih laije. Ajeh chu mipi hoa kona Danthu hethem louho dohna (questions) athah-thah aumjing nahlai jeh ahi.
Mishnah umdan chu hiti hi ahi. Milham hon Dan Thupeh ahetthem lou hou leh dohnom anei hou chu Rabbi ho koma lekha in ajih un Rabbi ho athot jiuvin, hichu Rabbi hon agelkhom jiuvin, adonbutna asemun dohna hinnei pa/nu chu alethot kit jiuvin ahi. Hitia aum jing jeh chun Hiche hi ‘Responsa’ tin ahung kihetdoh lo tan ahi. Tuni chanin Rabbi ho koma dohna leh lekhathot 2,50,000 tobang aumtan ahi. Kumjabi 18 (AD 18 Century), phatlai chun hiche Mishna hi ahilchetna ana-semun hichu, ‘Gemara’ ana tiuve. Hiche Mishna leh Gemara kigomchu Talmud akitin ahi.
Talmud Ni (2) Um: Talmud hi ni (2) aumin, khat chu (Babylonian Talmud) Babylon gam Talmud akitin, anina pa chu (Palestinian Talmud) Palestine gam Talmud akitin ahi. Hiche hi ahung kisemdohna gam toh kilhona kiminsah ahi.
Babylon Gam Talmud: Babylonian Talmud kiti hi Mishna leh Babylon gam a Rabbi ho hilchet kigom khom ahi. Hiche Babylon Talmud hin jihdoh hochu 586 B.C kuma soh-le-sal’a kai manga umho miching mithem ho chuleh, leng inna vaihom lamkai holeh aboltheidom ho chilhah ana-hiuve. Hijeh chun amahon ahin jihdoh Talmud chu Palestine gam Talmud sangin ahoijon ahi.
Palestine Gam Talmud: Hiche hi Mishna leh Palestine a Jewste Rabbi ho hilchet kigom khom ahi. Mishna hi Hebrew paova kisun ahin, Gemara vang Aramaic paova kisun ahi. Hiche Gemara hung kisemdohna dingin Rabbi 200 sanga tamjo ana-kikhom uvin, Gemara chu anasundoh un ahi. Gemara leh Talmud hi asim ding teng uleh Babylonte Gemara leh Babylonte Talmud hi adeilhen jouvin ahi. Ajeh chu, “Palestine gam a kisem Talmud sangin Babylon gama kisem Talmud agiljoi,” atiu ahi.
Jews miten akum dung juiyin Bible simdan aneijun ahi. Jews mi chapang khat chun kum 3 aphah a patnin Hebrew pao asimpan jin kum 10 aphah teng OT ahin simin, kum 13 aphah teng Gemara asimpan jitan ahi. Jews mi atamjon Talmud simnan ahinkho amang lhumkei theiyun ahi. Jews insung kimkhat chu numeihon achate vet-toh natoh akopjiuvin, ahin mipaten vang imadang bollouvin Talmud bou asim-sim jengun ahi.
Jewsten phatseh in Thulhun Lui (OT) hi Talmud a kijih tobang bang bouvin ajuijun, Talmud a kisei louho vang ajuipouve. Hitichun Rabbi hon achunguva thil hung lhung ho chu aphat dung juiyin Dan jahna ding seikhomna aneijiuvin ahi.
2.3Mishnah Lekhabu
Mishnah lekhabu hoa chun thuhil chomcha cha kisei (Short saying) aumin ahi. Abannei-cha Rabbi ho thuhil chomcha cha kisun thuchih ho kijih lutna ahi. Mishnah hi O.T a pansa (base) a kihilna jong ahi. Jews (Judaism) ho din hiche Mishna hi Christian-te Bible tobanga giltah a agel-u ahi. Jesu leija alenlaijin hiche kihilna (School) chu hetthei ni (2) ana umin ahi. Khat chu Shammai School ahin, anina chu Hillel School ahi. Hiche School teni hi athusei leh angaitona lhon akibangpon ahi.
Mishnah hi bu gup (6) in akihom khenin hichu; i). Zeraiem – (Lou lho thu) ii). Moed – (Kut ho leh Sabbath Dan) iii). Nasjiem- (Kichen leh Kida thu) iv). Nezielien -(Nisih chonna Dan (Civil Law) v). Kodasjiem- (Hou-in chung changa Dan) vi). Toharot- (Athengle aboh chung’a dan)

3.Judaism Dan Semthu Phabep
Jewsten Semthu Dan tamtah aneijun hichu, ‘Pathenin Mose koma ana seipeh a Mosen Danbu a anasun louva akama Israelte anahil-son ho ahi,’ atiuve. Hichu amaho houhil hon, ‘…akhang khanga ana chinpha peh uva ana juiying-u ahi,’ atiuve. Hiche Semthu Danho chu Pathen Danthupeh toh kibang abah vangin mihemho Semthu Dan ahijon ahi. Hiche danhoa chun Sabbath nikhoa bolding le bollou dingho, chuleh Kut nikhoa jui dingle juilou dingho jong tamtah Semthu Dan aumin ahi. Jewste din Sabbath nikhoa thilkhat thamkhah ding jeng jong chu, phallou ahikhadem tia som-vei ja-vei gelphat ngaija ahi. Hijeh chun Semthu Dan tamtah aneijun hiho chu amaho jengin jong jui hahsa tah-in ajui jiuvin ahi. Hiche Dan semthu ho jouse hi Mishna a konna bou ahi.3.1 Kut Nikho-a Ahtui
Kut nikhoa ahpi’n (hen) atui (egg) athah chu neh phal ham? Neh phallou ham? tihi amaho buoipi khat ahi. Hiche Kut nikhoa ahpi tuithah chu, ‘Shammai School,’ hon nehding phal ahi atiuvin, ahin ‘Hillel School’ hon vang neh ding aphal pouve. Ahinlah Rabbi khatnin vang, “Ex. 12:16 a kimu dung juiyin Sabbath leh kut (festival) hi akibang poi,” anatin ahi. Ajeh chu, “Kut (festival) nikhoa an (food) kihon thei ahin, Sabbath nikhon vang an (food) akihon thei poi,” atin ahi. Hijeh chun Kut nikho-a ahpi in atui athah chu nehthei ahi ati. Hitichun Jews hou-lamkai ho lah jenga jong kinel boutamna tamtah aumin ahi.
Sa-ngong Sang Sa
Rabbi phabep khat chu Africa gamkaija agakholjinna-uvah Sa-ngong sang (giraffe) amuvin ahileh, asa (meet) nehthei ahileh ahilou thu in seikhomna aneijun. Phat sottah seikhomna aneijou-vun sa-ngong-sang sa chu nehthei dingin pha asauvin ahi. Hijeh chun Jewste dinga sa-ngong-sang sa chu nehthei ahiye.
Pathen Min Jabol Dan (YAHWEH)
Judaism ho Dan semthu dung juiyin Exodus 20:7, “Nangman Pakai na-Pathen min chu moh mai maiya napat louding ahi.…,” Kiti hi amaho tahsan danin, Pathen min (name) ‘YHWH (YAHWEH)’ kiti hi moh jih leh ikama sodohsah jong phallou ahi. Chuleh lekhabu-a akijihkhah tah jongleh, ADONAI (Pakai)/Hajem tin asimun ahi. Ijemtia mikhat touvin kho-hepha-louva mun khat a ajih khah tah jongleh hichu noimang (Wipe/rub) phallou ahi. Hiche black board/chalk board chu chem’a atlhah (cut off) a leinoija vuiding ahi.
Pathen min YAHWEH chung changa thilsoh khat chu; Germany a chapang khatnin kho hepha louvin ‘YAHWEH’ kiti Pathen min chu blackboard a ana-jihkha’n ahileh, Rabbi ho akihouvun, noimang dingla phallou ahijeh chun, chempong lentah khatnin, blackboard chu a at-lhauvin hichu leinoija avuijun, chuin taona aneijun ahung kile kitnun ahi. Jewsten Bible alui (old) ho jeng jong Pathen min aum jeh in meija halmang louvin leinoiy ah avuijiuvin ahi.

Sopi Gancha Mansah Thu
“Nasopi gancha vahmang chu namu leh na lepui pehkit ding ahi, donlouva nakoi louding ahi.” (Deut 22:1-3).
Hiche thuhi Judaism hon Rabbi ho koma ana dongun, “Vapal (Dove) abuh a patna lengdoh chu munchom khatna achuh kimu leh eiman kimat thei ahidem? Ahilou leh (Deut 22:1-3) a kisei banga aneite gapeh ding ham? Chutia aneite gapeh kitding ahileh ichana gamla ho chu lepui thei hija, ichana gamla ho chu kilah thei ahidem? Tin Rabbi ho ana dongun ahi. Rabbi hon adonbutnau chu; “Ahcha/Gancha chu aneite ah-gil/vabuh (dovecote)/gancha akul’a patna meter 25 chana aumleh kilah phallou ahi. Amavang metres 25 sanga gamla joa umho chu kilah thei ahi,” atiuve. Ahin amaho lah-a khat chun adohbekitna achun; “Chutia meter 25 sanga gamlajo ho kilah thei ahija meter 25 chan in ahuopna sunga umho nung puipeh ding ahileh, hiche vapal/gancha chun hiche meters 25 alhinna gichin (line) chu kalche in ding-taleh i-loding ahidem, tin anadong’e. Rabbi hon hiche dohna chu donbut ding chu hahsa asalheh jengun ahi. Achainan, hitihin ana donbut uve, “Hitobang vacha/gancha meter 25 lhinna (line) gichin kalche a ding chu inop leh kilah thei ahin, aneite ilungset leh hoilut peh thei ahi,” atiuve.
Nu le Pa Jabol Louthei (Corban)
“Nanu napa jabolin, koi hile anu le apa housea chu thihel hen.” Exodus 20: 12, Deut. 5:16).
Hiche hi Danthu sunho le Pharisee hon amaho Dan Semthu dung juiyin; ‘mikhat chun anu-le-apa adamsunga ajabol sanga sum ijat ham khat chu Hou-in a maichama ahin pehlut pouleh adamsung-in anu-le-apa ajabol louthei ahi,’ atiuve. Hiche dan hi ‘Corban’ atiuvin ahi. (Hichu pehdoh, katdoh, lhandoh tina ahi). Jesun Danthu sunho le Pharisee ho chu hiche Corban kiti dan chung changa hiti hin anaphoh sal’in ahi, “Chuti chun nang ho chonna thu jalin Pathen thupeh nathai mang uve. Mipha lhemho, Isaiah-in nang ho khanchan ding thu aseiya: ‘Hiche phung mite hin akamuvin eijabolun, Alungu la keiya konnin gamlatah ahi; Amahon athu hil naova mihem thupeh jeng thua ahil jeh-uvin eihouvu jong moh ahi,’ ati. (Matthew 15: 4-9). Hiti chun Pathen thupeh sangin amaho kiledoh Semthu Dan (puchon- pachon) chu ana-nit joh jeh-un Jesun, “..a Pathen hou-u hi mohseh ahi,” anati’e.

Bong Sa le Bongnoi
“…,Gancha chu api noitwi a nahon theilou ding ahi.,” (Exodus 23:19).
Hiche thupeh hi Judaism houlamkai Rabbi hon hitin aledoh uve. ‘Sa leh bongnoi naneh khom theilou ding ahi,’ atiuve. Hiche kalval jong chun Rabbi hon sa leh bongnoi hi dokhang (table) chung khat-a koikhom ding jeng jong aphal pouvin Refrizirator (freezer) sung jenga jong sa leh bongnoi koikhom hi chonset’in agellun ahi. Hiche hi Bible a Pathen thupeh ho toh amaho kisemthu Dan akikhehna ahi.Jerusalem Lam Mai-ngat a Taona
(“..keiman nangma min dinga Houin kasahna lam hi angat’uva ahung taovuva ahileh, nangman van a konin atonau le athil thumu ngaipeh tei teiyin..,I Kings 8:44,45).
Jews ten taona anei phat u-leh Jerusalem lam maingat-in taona aneijiuvin ahi. Amaho lah-a khatnin Rabbi ho koma hitihin dohna khat anasem’e. Rocket a touva lhapi sunga galenglut miho lah-a Jews mi ho chun taona anei tengleu hoilam anga tadiuvem? tin ana dongin ahileh, hichu a donbut dingdan hahsa asa lheh jengun ahi. Jesun Samaria numeinu koma anaseipeh bangin, “Phat ahung lhunge, tu hi ahi, chutengle ahou tahbeh hon Pa chu lhagao le thutah a ahou dingu ahi.” John 4:23,24). Vannoi leisetna hoilai mun hihen, hoilam kinga jongleh Pathen chu lungthim pumpi’a taona neiho chu Pathen in asanpeh e. Ahin Judaism ho tahsan dana vang chuti chu ahipoi, hichu i-Pathen houvu akibahlou jeh hilouvin, amaho Semthu Dan jeh ahi. Ajeh chu, Jerusalem khopi leh Hou-in um masangin jong Pathen in Ebel, Noah, Abraham, Mose, Joshua, Samuel, David ho taona jong ana sanpeh e.
Cheptan (Circumcission)

“Vetan nikho ho chu ahunglhunge, tin Pakaijin aseije, “Keiman tahsa a chep kitan ho chu talent (gotna) kapeh ding chu..,” Jeremiah 9: 25).
Judaism tahsan (sakho) a lutna dinga cheptan hi amasapen leh akhohpen khat chu ahi. Mikhat chu itobang in Judaism thuhil tahsan henlang Hebrew pao themlheh jongleh chep akitan lou leh Jews mi khat’a kisim theilou, Judaism a jong kisim theilou ahi (Genesis 17:9-14). Vetsahnan: Ishmael chilhah Muslim hon jong chep akitannun ahi. Ahivang in amaho chu lhagao sochatna ding ahipoi Abraham chilhah ahijeh-u ahi. Cheptan jeh a mihem chu sohcha ahipoi. Solchah Paul in Christa tahsan ho dingin, Numei pasal, Greek mi Rom mi, Juda mi, cheptan leh tan lou soh leh chamlhat akikhehna aumpoi atin ahi (Galatians 3:28). Enoch leh Noah ho jong chu cheptan louvin anasohcha-uvin ahi. Hiche hi tahsa lama Jesu Christa hungpenna khanggui kihetna dinga Pathen toh Israelte kikah a thupeh ahibouve.
Solchah Paul in Rome khopi’a Jews (Juda mi) ho koma lekha ana-sutna chun cheptan thu hiti hin anaseiye, “Nangma danthua nanunle nacheptan chu phatchomna nanei ding ahin, danthua nanun lou vangle nacheptan chu tan lou ahitai. Chuti ahi jeh-a chu cheptanlou chu cheptana kisim lou ding ham? Apena cheptanlou mong danthu nit soh chun lekhajema thule cheptan dan neiya jong danthu sukeh-a nangma nathemmosah lou ding ham? Apolam a mi mua Judah mi (Jews) hichu Judah mitah ahipoi, apolam ati (body) chunga cheptan jong chu cheptan ahipoi. Asunggil’a Judah mi hibou chu Judah mi ahin, chuleh lekhajema hilouva lhagaova lunggil lam cheptanbou chu cheptan ahi; ama chu mihem pachat loa hilouvin Pathen pachat alojoh ahi,”(Romans 2:25-29).

Judaism tahsan hi Bible a Israelte/Hebrew ho Pathen tahsan toh akibang poi. Mose lekhabu nga (5) hoa a kona kiladoh kihilna ahijeng vangin, Pathen thupeh sanga chungnungjo in Danthu Sunho hilchet leh Rabbi ho lekha sutna kona kihilna ahibouve. Hijeh chun Pathen thupeh sanga amaho Semthu Dan ho chu agelthupi jeh-uvin, Jesun Juda houlamkai ho chu anaphohsal’in ahi. Judaism hi nitin chondan leh atheng aboh, natoh dingdan leh Sabbath nikho nitje kihilna ahibouve. Hijeh chun Judaism ah hin lhagao sochatna aumpon, lhagao thu jong aumpoi. Hiche Danthu Sunho lunggel leh khonunga Rabbi ho mihilna ho chu Talmud a hung kisemdoh a, hichu Judaism ho lekhabu theng (Bible) khat a hung umdoh ahi. Hijeh chun Bible a Mose, Joshua, Samuel, David, Daniel, kiti ho Pathen tahsandan toh akitohpon ahi. Judaism hon Bible asim vangun amaho deilhenna mun leh amaho deidan tah in akiledoh un, Pathen deilam chu ajuipouve.

x

Hi!
I'm Sam!

Would you like to get a custom essay? How about receiving a customized one?

Check it out